Hönnun jakkans er skemmtileg en rennilásinn sem er með tvíhliða rennum liggur upp undir vinstra kjálkabein og ertir því ekki hökuna. Hálsmálið er hátt sem veitir góða vörn yfir höku og munn ef þörf krefur en ef þess gerist ekki þörf eru á kraganum litlir seglar sem hægt er að nota til að bretta hálsmálið til hliðar og auka loftun. Hettan á jakkanum nær vel yfir skíða- eða klifurhjálm og er á henni strekkingarteygja bæði að aftan og á báðum hliðum auk þess sem á hettunni er gott der sem vinnur vel í miklu regni og vindi. Hettan er tiltölulega nett og hamlar sjóninni ekki mikið til hliðanna.

    Mér finnst efni jakkans anda vel og auk þess eru á jakkanum stór rennd loftunargöt á báðum síðum með tvíhliða rennum sem er frábær eiginleiki til að lofta út í púli á meðan rignir eða blæs. Loftopin ná vel fyrir ofan handarkrika og alveg niður með síðum og veitir hönnunin jafnframt sniðuga leið til að komast í vasa í millilögum. Tveir vasar sem rúma stóra síma og rúmlega það liggja ofarlega á sitthvorri hlið jakkans og auðvelt er að komast í vasana og loftgötin þegar maður er með bakpoka eða klifurbelti. Þá er góður netavasi á innanverðum jakkanum auk vasa á tvíhöfðanum þar sem jafnframt er að finna fjarlægjanlegan Recco snjóflóðaendurvarpa. Auðvelt er að renna rennilásum jakkans með þykkum vettlingum. Ermarnar eru vel síðar í samræmi við hönnun skeljajakka til að ná vel yfir vettlinga, mjög gott rými er við úlnlið fyrir þykka vettlinga ef þarf og franskur rennilás til að þrengja að sem auðvelt er að nota. Neðarlega á ermum eru lykkjur sem má krækja í, t.d. vettlingum.